មន្ទីរពេទ្យមិត្តភាពខ្មែរ សូវៀត ឬហៅថាពេទ្យរុស្សី ជាមន្ទីរពេទ្យសាធារណៈស្ថិតនៅក្រោមការគ្រប់គ្រងរបស់ក្រសួងសុខាភិបាល ដែលមានទីតាំងនៅតាមបណ្តោយមហាវិថីកងយោធពលខេមរភូមិន្ទ ក្នុងខណ្ឌចំការមន រាជធានីភ្នំពេញ ។
នៅប្រទេសកម្ពុជា មន្ទីរពេទ្យមិត្តភាពខ្មែរ សូវៀត ជាមន្ទីរពេទ្យដ៏ធំមួយ ដែលបានសាងសង់ នៅលើផ្ទៃដីប្រមាណ ១០ហិចតា ។ បច្ចុប្បន្នមន្ទីរពេទ្យមានចំនួនគ្រែសរុប កើនដល់ ៥០០គ្រែ និងមន្ត្រី បុគ្គលិករាជការក្នុងក្របខណ្ឌបម្រើការចំនួន ៥៤៥នាក់ ក្នុងនោះមាន ប្រុស ២៩៦នាក់ និងស្រី ២៤៩នាក់ ។
តួនាទីមន្ទីរពេទ្យ
មន្ទីរពេទ្យដើរតួយ៉ាងសំខាន់ក្នុងវិស័យសុខាភិបាលរបស់ប្រទសកម្ពុជា ។ មន្ទីរពេទ្យមានតួនាទី ៖
- ពិនិត្យ និងព្យាបាលជំងឺគ្រប់ប្រភេទ
- ផ្តល់នូវសេវាបង្ការជំងឺឆ្លងនានា តាមរយៈការចាក់វ៉ាក់សាំងបង្ការជំងឺរបេង ជំងឺតេតាណុស ជំងឺកញ្ជ្រិល ជំងឺខាន់ស្លាក់ ជំងឺរលាកថ្លើមប្រភេទបេ និងវ៉ាក់សាំងបង្ការជំងឺមហារីកមាត់ស្បូន
- ទទួល និងបណ្តុះបណ្តាលសិស្ស និស្សិតដែលមកពីសាកលវិទ្យាល័យវេជ្ជសាស្ត្រនានា ទាំងក្នុងនិងក្រៅប្រទេស
- សហការជាមួយអង្គការដៃគូ និងអង្គការអភិវឌ្ឍន៍នានា ទាំងក្នុងនិងក្រៅប្រទេសក្នុងការងារស្រាវជ្រាវ បង្ការ និងអភិវឌ្ឍន៍សុខាភិបាល
- ចូលរួមជាមួយកម្មវិធីជាតិនានា ដូចជាកម្មវិធីបង្ការ និងព្យាបាលជំងឺអេដស៍ ជំងឺរបេង
រចនាសម្ព័ន្ធរដ្ឋបាលរបស់មន្ទីរពេទ្យ
មន្ទីរពេទ្យមាននាយកមន្ទីរពេទ្យ ១រូប និងនាយករងមន្ទីរពេទ្យ ៧រូប ។ មន្ទីរពេទ្យមានការិយាល័យក្រោមឱវាទ ៣ គឺ ការិយាល័យរដ្ឋបាល ការិយាល័យគណនេយ្យ និងការិយាល័យបច្ចេកទេស ។ ក្រៅពីនេះ មន្ទីរពេទ្យមានផ្នែកវេជ្ជសាស្ត្រចំនួន ២២ផ្នែក និងផ្នែកជំនួយវេជ្ជសាស្ត្រចំនួន ៦ ។
ការបែងចែកធនធានមនុស្សតាមកំរិតជំនាញ
- សាស្ត្រាចារ្យមហាបរិញ្ញា ១១នាក់
- វេជ្ជបណ្ឌិតឯកទេស ៤៨នាក់
- ម៉ាស្ទ័រ ៤នាក់
- វេជ្ជបណ្ឌិត ១១៣នាក់
- ឱសថការីឧត្តម ១២នាក់
- ឱសថការីមធ្យម ៣នាក់
- គ្រូពេទ្យធម្យម ១៦នាក់
- គិលានុប្បដ្ឋាកមធ្យម ១៨៣នាក់
- គិលានុប្បដ្ឋាកបឋម ១២នាក់
- ទន្តបណ្ឌិត ១០នាក់
- ទន្តពេទ្យ ២នាក់
- ធ្មបមធ្យម ៦៣នាក់
- ឆ្មបបឋម ២នាក់
- អ្នកបច្ចេកទេសមន្ទីរពិសោធន៍មធ្យម ២៤នាក់
- អ្នកបច្ចេកទេសមន្ទីរពិសោធន៍ ៦នាក់
- ក្រៅពីនេះ មានមន្ត្រី ដាក់ថ្នាំសណ្តំ បុគ្គលិកជាប់កុងត្រា និងបុគ្គលិកបណ្តែត ។
ការផ្តល់សេវាមន្ទីរពេទ្យមានដូចជា ៖
- ផ្នែកពិគ្រោះជំងឺក្រៅទូទៅ និងពិគ្រោះឯកទេសទាំងកុមារ និងមនុស្សចាស់
- ផ្នែកសម្រាកពេទ្យ មាន ផ្នែកវេជ្ជសាស្ត្រទូទៅ សង្គ្រោះបន្ទាន់ ជំងឺឆ្លង ជំងឺមហារីក ជំងឺសួត ជំងឺសសៃប្រសាទ ជំងឺកុមារ ជំងឺផ្លូវចិត្ត មាត្រសាស្ត្រ រោគស្ត្រី សម្ភព វះកាត់កុមារ វះកាត់ មនុស្សចាស់ ផ្នែកថែទាំក្រោយវះកាត់ ផ្នែកត្រចៀក ច្រមុះ បំពង់ក ផ្នែកចក្ខុសាស្ត្រ និងជំងឺមាត់ធ្មេញ ។
- ផ្នែកអមវេជ្ជសាស្ត្រ មានដូចជាផ្នែកមន្ទីរពិសោធន៍ ផ្នែកថតឆ្លុះ ផ្នែកថតសុដន់ និងផ្នែកជំនួយវេជ្ជសាស្ត្រដ៏ទៃទៀត
- ក្រៅពីនេះមន្ទីរពេទ្យមិត្តភាពខ្មែរ សូវៀត បានអនុវត្តកម្មវិធីជាតិមួយចំនួនដូចជា កម្មវិធីអេដស៍ របេង កម្មវិធីជំងឺផ្លូវចិត្ត កម្មវិធីបង្ការ ចំលងពីម្តាយទៅទារកជាដើម ។
ប្រវត្តិមន្ទីរពេទ្យ
មន្ទីរពេទ្យមិត្តភាពខ្មែរ សូវៀត ត្រូវបានចាប់ផ្តើមកសាងនៅចុងទសវត្ស ១៩៥០ ក្រោមការឧបត្ថម្ភដោយរដ្ឋាភិបាលសហភាពសូវៀត ហើយត្រូវបានសម្ពោធ និងដាក់ឱ្យប្រើប្រាស់ជាផ្លូវការនៅថ្ងៃទី ២៩ សីហា ១៩៦០ ដោយមានឈ្មោះថា មន្ទីរពេទ្យកម្ពុជា សូវៀត ។
ការផ្លាស់ប្តូរឈ្មោះមន្ទីរពេទ្យ
- ថ្ងៃសម្ពោធរហូតដល់ ឆ្នាំ១៩៧៥ ៖ មន្ទីរពេទ្យកម្ពុជា សូវៀត
- របបកម្ពុជាប្រជាធិបត្តេយ្យ (១៩៧៥ ដល់ ១៩៧៩) ៖ មន្ទីរពេទ្យ ១៧ មេសា
- របបសាធារណរដ្ឋប្រជាមានិតកម្ពុជា (១៩៧៩ ដល់ ១៩៩៣) ៖ មន្ទីរពេទ្យកម្ពុជា សូវៀត
- ១៩៩៣ ដល់ ២០០៥ ៖ មន្ទីរពេទ្យ ព្រះបាទនរោត្តមសីហនុ
- ២០០៥ ដល់បច្ចុប្បន្ន ៖ មន្ទីរពេទ្យមិត្តភាពខ្មែរ សូវៀត
នាយកគ្រប់គ្រង
- មុនឆ្នាំ ១៩៧៥ ៖ លោក សាមៀ ផល្គុន និង សាស្ត្រាចារ្យ គឹម វៀន
- ១៩៧៥ ដល់ ១៩៧៩ ៖ សាស្ត្រាចារ្យ ឡេង សី
- ១៩៨០ ដល់ ១៩៩៣ ៖ សាស្ត្រាចារ្យ ជ័យ វិទ្យា, ឯកឧត្តម តែ គុយសៀង និង សាស្ត្រាចារ្យ លឹម ថៃភាង
- ១៩៩៣ ដល់ ១៩៩៧ ៖ សាស្ត្រាចារ្យ សំ សូភាន
- ១៩៩៧ ដល់ ២០០៦ ៖ វេជ្ជបណ្ឌិត អ៊ី ទួនសៀង
- ២០០៧ ដល់ ២០១២ ៖ សាស្ត្រាចារ្យ សាយ សេងលី
- ២០១២ ដល់បច្ចុប្បន្ន ៖ សាស្ត្រាចារ្យ ងី ម៉េង
ទំនាក់ទំនងទៅកាន់ មន្ទីរពេទ្យមិត្តភាពខ្មែរ សូវៀត
Website : http://khmersoviethospital.org.kh/
ប្រភព មន្ទីរពេទ្យមិត្តភាពខ្មែរ សូវៀត
