សម្រាប់បងៗជាស្ត្រីទាំងអស់ ក្នុងអំឡុងពេលមានផ្ទៃពោះ គួរតែមានការមើលថែអោយបានត្រឹមត្រូវទៅលើសុខភាពខ្លួនឯង ក៏ដូចជា សុខភាពកូនក្នុងផ្ទៃផងដែរ ដើម្បីធានាអោយមានសុវត្ថិភាព និង ការលូតលាស់ល្អ ជៀសវាងការបង្ករផលប៉ះពាល់ឬគ្រោះថ្នាក់ដល់អាយុជីវិត។ នៅថ្ងៃនេះ ក្រុមការងារ ខេមបូរីផត យើងខ្ញុំ សូមលើកយកចំណុចល្អៗ ចំនួន 12 យ៉ាង ដែលស្ត្រីមានផ្ទៃពោះ គួរតែយល់ដឹង និង អនុវត្តអោយបានល្អជាប្រចាំ។
- ត្រូវប្រញាប់ប្រញាល់ទៅផ្តល់ដំណឹងពីការមានផ្ទៃពោះរបស់ខ្លួន ទៅអោយគ្រូពេទ្យ ឬ ឆ្មបជំនាញ ដើម្បីអោយគាត់តាមដាននិងរៀបចំកាលវិភាគសម្រាប់ការទៅត្រួតពិនិត្យម្តងៗ។
- សង្កេតមើលការហូបចុករបស់អ្នក ដោយអ្នកត្រូវបរិភោគនូវសារជាតិប្រូតេអ៊ីន អោយបានដល់ទៅ 70 ក្រាម សម្រាប់ពេលមានផ្ទៃពោះ ដែលធៀបទៅនឹងពេលមិនទាន់មានផ្ទៃពោះត្រឹមតែ 45 ក្រាមប៉ុណ្ណោះ ហើយអ្នកជៀសវាងការហូបនូវស៊ុតមិនទាន់ចម្អិន និង សាច់ ក៏ដូចជាអាហារសមុទ្រដែលមិនឆ្អិនល្អ ព្រោះអាចបណ្តាលអោយប៉ះពាល់ដល់សុខភាពទារកក្នុងផ្ទៃ។
- ស្រូបយកជាតិវីតាមីនអោយបានច្រើន ជាពិសេសសារធាតុ Folic Acid និង មានជាតិដែកនៅក្នុងខ្លួនច្រើន។ ការដែលមាន Folic Acid ច្រើន អាចជួយកាត់បន្ថយគ្រោះហានិភ័យដល់ទារកក្នុងផ្ទៃពីការប៉ះពាល់ដល់ប្រព័ន្ធសរសៃប្រសាទ។
- ការធ្វើលំហាត់ប្រាណជាប្រចាំ បានជួយអោយអ្នកមានអារម្មណ៍ស្រស់ថ្លា ជៀសផុតពីការឈឺចាប់ ឈឺសន្លាក់ និង កម្លាំងកំហែងរឹងមុំា សរសៃឈាមដើរស្រួល ហើយពេលប្រសូត្របុត្រ ក៏មានលក្ខណៈស្រួលជាងធម្មតាដែរ។
- ត្រូវឈប់សម្រាកអោយបានគ្រប់គ្រាន់ ជាពិសេសនៅក្នុងអំឡុងត្រីមាសទី 3 នៃការមានផ្ទៃពោះរបស់អ្នក ដូចជា ការដកដង្ហើមមួយៗ និង ម៉ាស្សាជាដើម ដើម្បីកាត់បន្ថយភាពតានតឹង ធ្វើអោយការគេងមានសភាពស្ងប់ល្អ ហើយការស្លៀកពាក់ កុំសូវតឹងពេក។
- ត្រូវនិយាយថាទេ ចំពោះគ្រឿងស្រវឹង ព្រោះវាមានឥទ្ធិពលដល់សរសៃឈាមរបស់កូន និង ទងសុក ដែលអាចបណ្តាលអោយកូនក្នុងផ្ទៃជួបនូវគ្រោះហានិភ័យមួយចំនួននៅពេលកើតមក។
- មិនត្រូវលេបថ្នាំដោយគ្មានវេជ្ជបញ្ជានោះទេ ព្រោះថ្នាំដែលអ្នកបានលេបហើយ នឹងហូរចូលក្នុងសរសៃឈាមរបស់ទារក បណ្តាលអោយទារកកើតមក មានសភាពញាក់ញ័រខុសប្រក្រតី។
- បញ្ឈប់ការជក់បារី ព្រោះការជក់បារី អាចបង្ករហានិភ័យមួយចំនួនដូចជា ការរលូតកូន ដាច់ទងសុក ឬ កូនកើតមកមិនគ្រប់ខែ ឬមួយក៏កើតមកមានអវៈយវៈមិនគ្រប់គ្រាន់ ឆែបត្រង់កន្លែងណាមួយជាដើម។
- កាត់បន្ថយការពិសារជាតិកាហ្វេ ព្រោះការសិក្សាបានបញ្ជក់ថា ស្រ្តីដែលពិសារជាតិកាហ្វេច្រើនក្នុងអំឡុងពេលមានផ្ទៃពោះប្រឈមមុខនឹងការរលូតកូនច្រើនជាងស្រ្តី ដែលមិនពិសាកាហ្វេ។
- ការងារមួយចំនួនក៏អាចប៉ះពាល់ដល់សុខភាពក្នុងផ្ទៃរបស់អ្នកដែរ ដួចជា ការងារទាក់ទងទៅនឹងការផលិតនូវសារធាតុគីមី កន្លែងមានសារធាតុវិទ្យុសកម្ម ឬ ប្រើប្រាស់ផលិតផលដែលមានក្លិនមិនល្អ ជាដើម។
- ការពិនិត្យមើលសុខភាពមាត់ធ្មេញរបស់ស្រ្តីជាមាតា មានសារៈសំខាន់ណាស់ ដើម្បីជៀសវាងនូវការកើតឡើងជម្ងឺអញ្ចាញធ្មេញ ធ្វើអោយបាត់បង់នូវអរម៉ូនផ្សេងៗ។ ជាពិសេសត្រូវទៅជួបគ្រូពេទ្យក្នុងរយៈពេល 6 ខែ ចុងក្រោយ។
- ជាចុងក្រោយនោះ គឺថា ស្រ្តីជាមាតា ត្រូវតែធ្វើអារម្មណ៍អោយស្រស់ស្រាយក្នុងស្ថានភាពរស់នៅអោយបានច្រើនក្នុងអំឡុងពេលមានផ្ទៃពោះ ដើម្បីអោយសតិអារម្មណ៍របស់ទារកមានសភាពល្អ ជៀសវាងការកើតនូវជម្ងឺស្រ្តេស ឬ ការគិតមិនល្អផ្សេងៗ។
ដូច្នេះ ដើម្បីធានាបាននូវសុខភាពល្អរបស់មាតាជាម្តាយ និង កូនក្នុងផ្ទៃ គឺថា ស្រ្តីមានផ្ទៃពោះគ្រប់រូបគួរតែស្វែងយល់នូវចំណេះដឹងអោយបានច្រើនទាក់ទិនទៅនឹងការបរិភោគ ការការពារ(មិនត្រូវធ្វើការធ្ងន់ធ្ងរ ឬហក់លោតនោះទេ) ការថែរក្សា ពេលវេលា និង ស្វែងយល់ពីអារម្មណ៍ខ្លួនឯងអោយបានច្រើនផងដែរ៕
ប្រភព Cambo Report
0 Komentar