ទឹកដូងគឺជាភេសជ្ជៈធម្មជាតិដ៏ពិសេសមួយ ដែលយើងមានភាពងាយស្រួលរកវាមកទទួលទានបំផុត ហើយវាក៏មានតម្លៃធូរថ្លៃផងដែរ បើប្រៀបធៀបជាមួយភេសជ្ជៈកំប៉ុង។ ជារឿយៗ ឪពុកម្តាយរបស់យើងតែងតែណែនាំយើងអោយទទួលទឹកដូងនៅពេលដែលយើងមានអាការៈក្តៅខ្លួន ឈឺថ្កាត់ជាដើម ព្រោះអីវាគ៏ជាទឹកឱសថដ៏អស្ចារ្យ អាចព្យាបាលយើងយ៉ាងមានប្រសិទ្ធភាព។ ទឹកដូងមិនត្រឹមតែជាឱសថដ៏ល្អតែប៉ុណ្ណោះទេ តែវាក៏ជាភេសជ្ជៈសម្រាប់ទទួលទានដែលសំបូរទៅដោយអត្ថប្រយោជន៍ជាច្រើនផងដែរ។ ខាងក្រោមនេះគឺជាអត្ថប្រយោជន៍ដ៏អាថកំបាំងរបស់ទឹកដូង ចំពោះសុខភាពរបស់អ្នក ដែលអ្នកប្រហែលជាមិនធ្លាប់បានដឹងពីមុនមកនោះទេ។
1. ជាភេសជ្ជៈដ៏ល្អបំផុត ដែលអាចបំបាត់ភាពស្រេកទឹកបានយ៉ាងឆាប់រហ័ស។ នៅក្នុងទឹកដូង វាមានផ្ទុកទៅដោយសារធាតុមានប្រយោជន៍ច្រើន ដូចជាជាតិស្ករ អេឡិចត្រូលីត្រ និងសារធាតុរ៉ែមានប្រយោជន៍ជាច្រើនទៀត។ សម្រាប់អ្នកហាត់កីឡាគួរតែជ្រើសរើសយកទឹកដូង ជាជាងភេសជ្ជៈកំប៉ុង ព្រោះវាមានជាតិស្ករតិចតួចតែប៉ូតាស្យូមច្រើន អាចបំបាត់ភាពស្រេចទឹកបានរហ័ស។
2. ទឹកដូងក៏មានប្រសិទ្ធភាពខ្ពស់សម្រាប់ព្យាបាលជំងឺរាគផងដែរ ព្រោះអីវាមានផ្ទុកទៅដោយសារធាតុអង់ស៊ីម សារធាតុរ៉ែសំខាន់ និងអាស៊ីតខ្លាញ់មានអត្ថប្រយោជន៍ជាច្រើនទៀតដែលរាងកាយយើងបាត់បង់នៅពេលរាគ។ អ្នកជំងឺរាគគួរតែផឹកទឹកដូងអោយបានច្រើន ព្រោះវាអាចបំពេញទាំងជាតិទឹកក្នុងខ្លួនដែលបាត់បង់ផង ហើយក៏បំពេញនូវសារធាតុសំខាន់ៗនានាផងដែរ។
3. នៅក្នុងទឹកដូងមានសារធាតុ Cytokinins ដែលវាអាចរក្សាស្បែកអោយមានភាពសខ្ចី កោសិការីកលូតលាស់ល្អ អោយអ្នកទទួលមានភាពវ័យក្មេងជាងអាយុបាន។
4. ទឹកដូងក៏ជួយអោយប្រព័ន្ធរំលាយអាហារយើងមានភាពល្អប្រសើរផងដែរ ដោយសារតែវាផ្ទុកដោយអាស៊ីត Phosphatase, Catalase, dehydrogenase, Diastase ដែលជួយដល់ការរំលាយ និងស្រូបយកសារធាតុចិញ្ចឹម។
5. ទឹកដូងមួយផ្លែសំបូរដោយប៉ូតាស្យូមច្រើនជាងចេកបួនផ្លែអោយនោះ ហើយក៏សំបូរទៅដោយសារធាតុកាល់ស្យូម ដេក ម៉ាញ៉េស្យូម និងស័ង្គសីផងដែរ ដែលជាសារធាតុចាំបាច់បំផុតរបស់រាងកាយក្នុងការប្រឆាំងការពារនឹងជម្ងឺនានា។
6. វាអាចជួយកាត់បន្ថយការហើមប៉ោងនៅដៃជើង ជួយកំចាត់មុននៅពេលដែលយើងប្រើប្រាស់វាយកមកលុបមក គ្រប់គ្រងសម្ពាធឈាម អាចរំលាយគ្រួសក្នុងតម្រង់នោម ហើយក៏ជួយរក្សាកម្រិត PH នៅក្នុងខ្លួនអោយមានភាពនឹងនរផងដែរ។
សរុបសេចក្តីមក ទឹកដូងគឺជាភេសជ្ជៈមកធម្មជាតិដ៏ពិសេសមួយ ដែលអ្នកគួរតែឧស្សាហ៍ទទួលទានអោយបានច្រើន ជាជាងភេសជ្ជៈកំពុង ព្រោះអីវាមានជាតិស្ករតិចតួចបំផុត ហើយក៏សំបូរទៅដោយសារធាតុសំខាន់ៗដែលរាងកាយយើងត្រូវការផងដែរ។ អ្នកដែលមានជំងឺទឹកនោមផ្អែម រឺក៏ធីងធោង ស្លេកស្លាំងក៏គួរតែឧស្សាហ៍ទទួលទានទឹកដូងផងដែរ ព្រោះអីវាអាចជួយអោយខ្លួនប្រាណរបស់យើងមានភាពរឹងមាំ ធូរស្រាលជាងមុនបាន។
ប្រភព Cambo Report
0 Komentar