មាតាបិតាមួយចំនួនបានដឹងហើយថា ការជ្រើសរើស វីធីបំបៅដោះកូនដោយទឹកដោះ ឬទឹកដោះម្តាយ វាមានភាពខុសគ្នាដូចមេឃ និងដី ។ ផ្ទុយទៅវិញមាតាបិតាមួយចំនួន នៅតែជ្រើសរើសវីធីបំបៅដោះកូន ដោយទឹកដោះគោប្រចាំ បើទោះបីដឹងថា កុមារអាចមានជម្ងឺច្រើន ប្រសិនបើបៅទឹកដោះគោក៏ដោយ ព្រោះទឹកដោះគោមិនមានជាតិអ្វីជួយទប់ស្កាត់នូវ ជម្ងឺ ដែលបានកើតមានឡើងទៅលើកុមារឡើយ ។ ចំណែកទឹកដោះម្តាយ មានសារជាតិទប់ស្កាត់ អាចជួយបន្ថយនូវអាការជម្ងឺមួយចំនួន ដែលមានបំណងយាយីលើកុមារបានច្រើនផងដែរ ។
ផលល្អចំពោះកុមារបំបៅដោយទឹកដោះម្តាយ ការបំបៅកូនដោយទឹកដោះម្តាយ គឺមានប្រយោជន៍ច្រើនយ៉ាង ដូចជា ជួយការពារទារកទប់ទល់នឹងជម្ងឺអាលែកហ្ស៊ី ការពារទារកទប់ទល់ជម្ងឺរ៉ាំរ៉ៃមួយចំនួនជាដើម ។ មិនតែប៉ុណ្ណោះវិធី ជ្រើសរើសដែលល្អនោះ ត្រូវបំបៅកូនដោយទឹកដោះមួយមុខគត់ យ៉ាងហោចណាស់បានរយៈពេល ៦ ខែទើបសមល្មម ។ ប្រសិនបើមាតាបំបៅដោះកូនរហូតដល់ ១២ ខែ វាកាន់តែល្អសម្រាប់ទារក វាធ្វើឲ្យកុមារនោះមានបញ្ញាឈ្លាសវៃទៀតផង ។
សារៈប្រយោជន៍ របស់ការបំបៅកូនដោយទឹកដោះម្តាយ
១- ការបំបៅដោះកូនមានប្រយោជន៍ជួយទប់ទល់នឹងជម្ងឺឆ្លងតាមរយៈ ប្រព័ន្ធការពារដែលគេហៅថា ’អង់ទីគ័រ” ដែលមាននៅក្នុងទឹកដោះម្តាយ ។ វាអាចការពារជម្ងឺឆ្លងបានច្រើនយ៉ាង ដូចជា ជម្ងឺរលាកត្រចៀក ជម្ងឺរាក ជម្ងឺរលាកផ្លូវដង្ហើម កាត់បន្ថយជម្ងឺរលាកស្រោមខួរក្បាល ។ល។
២- ការពារទប់ទល់អាលែកហ្ស៊ី ការពារជម្ងឺហឺត ការពារជម្ងឺទឹកនោមផ្អែម ការពារជម្ងឺធាត់តិចជាងក្មេងបៅទឹកដោះគោ ។ ទាំងអស់នេះ វាធ្វើឲ្យកាត់បន្ថយចំនួនថ្ងៃកើតជម្ងឺរបស់ក្មេង ដោយសារក្មេងដែលបៅទឹកដោះ ម្តាយមិនសូវបង្ហាញអាការជម្ងឺដូចក្មេងបៅទឹកដោះគោ ។
៣- ទឹកដោះម្តាយផ្តល់នូវអាហារចិញ្ចឹមគ្រប់គ្រាន់ ហើយទឹកដោះម្តាយងាយស្រួលរំលាយ និងស្រូបយកបានល្អជាងទឹកដោះគោ ។ មានន័យថា កុមារបៅទឹកដោះម្តាយងាយរលាយអាហារ មិនបណ្តាលឲ្យទារកឈឺពោះ ឬហើម ពោះរាកនោះទេ ។
៤- ទឹកដោះម្តាយមិនចាំបាច់ចំណាយប្រាក់កាក់ ហើយជួយសន្សំប្រាក់ថែមទៀត ទៅលើបញ្ហាចំណាយលើជម្ងឺឈឺថ្កាត់ផ្សេងៗ ។ ព្រោះទឹកដោះ ម្តាយ ជួយកាត់បន្ថយជម្ងឺបានច្រើន ។
៥- ទឹកដោះម្តាយមានរសជាតិគ្រប់បែបយ៉ាង ធ្វើឲ្យកុមារទទួលបានវីតាមីន និងថាមពលគ្រប់គ្រាន់ ។ ហើយរសជាតិនៃទឹកដោះម្តាយនោះ បានផ្លាស់ប្តូរគ្រប់រសជាតិ ទៅតាមចំណីអាហារ ដែលម្តាយទទួលទាន ។ ដូច្នេះហើយកុមារភាគច្រើន ចូលចិត្តបៅទឹកដោះម្តាយជាងទឹកដោះគោ ដោយសារតែទឹកដោះគោមានរសជាតិតែមួយមុខ ។
៦- មានលក្ខណៈងាយស្រួល ក្នុងការបំបៅកូនដោយទឹកដោះម្តាយ ច្រើនជាបំបៅដោយទឹកដោះគោម្សៅ ។ ការបំបៅដោយដោះម្តាយមិនចាំបាច់មានកំប៉ុង មិនចាំបាច់មានក្បាលដោះ និងមិនចាំបាច់លាងសម្អាត ឬស្ងោរអនាម័យឡើយ ។ ទឹកដោះម្តាយគ្រាន់តែលាងដោះឲ្យស្អាត ជាញឹកញាប់មុនពេលបំបៅជាការស្រេច ។
៧-ទឹកដោះម្តាយការពារជម្ងឺធាត់ទៅលើទារក និងការពារម្តាយមិនឲ្យធាត់ផងដែរ ហើយមិនអាចវិលទៅរកទម្ងន់មុនពេលពពោះ ។
៨- ទារកបំបៅដោះម្តាយមានបញ្ញាឈ្លាសវៃ ជាងទារកបៅទឹកដោះគោម្សៅ ។ មិនតែប៉ុណ្ណោះសុខភាពផ្លូវចិត្តរបស់ទារកល្អ និងបង្កើតភាពស្និទ្ធស្នាលជាមួយម្តាយ និងមានទឹកចិត្តស្រឡាញ់ឪពុកម្តាយផងដែរ ។
៩- ទារកបៅដោះម្តាយជួយឲ្យម្តាយកាត់បន្ថយអត្រាគ្រោះថ្នាក់ជម្ងឺបេះដូង និងកាត់បន្ថយអត្រាគ្រោះថ្នាក់លើសគីឡូ ព្រមទាំងផ្តល់ឲ្យម្តាយមានមធ្យោបាយការពារកំណើតមួយ ’កម្រមានផ្ទៃពោះ” និងកាត់បន្ថយអត្រាជម្ងឺមហារីកមាត់ស្បូន ជម្ងឺក្រពេញ និងកាត់បន្ថយជម្ងឺមហារីកផ្សេងៗទៀត ។
គុណវិបត្តិរបស់ទារកបំបៅទឹកដោះម្តាយ
១- អាចធ្វើឲ្យម្តាយពិបាកងើបអង្គុយបំបៅដោះ នៅពេលដែលទារកយំម្តងៗ បណ្តាលឲ្យម្តាយឈឺឆ្អឹងឆ្អែង ចុកខ្នង មិនស្រួលខ្លួន ។
២- បំបៅដោះម្តាយ ត្រូវបំបៅដោះញឹកជាប់ជាងទឹកដោះគោម្សៅ ព្រោះទឹកដោះម្តាយងាយស្រួលរំលាយ និងស្រូបជាងទឹកដោះគោម្សៅ ។
៣- ម្តាយដែលបំបៅដោះកូនដោយទឹកដោះ ត្រូវតែទទួលទានអាហារ ដោយមានការប្រុងប្រយ័ត្ន មិនអាចទទួលទានផ្តេសផ្តាសទេ ព្រោះអាចបណ្តាលឲ្យទារកមានជម្ងឺផ្សេងៗ ។
៤- ទារកជួបផលលំបាកនៅពេលដែលម្តាយមានជម្ងឺ ឬមានបញ្ហាអ្វីមួយ ដូចជា ពេលប្រើប្រាស់ថ្នាំច្រើន គឺធ្វើឲ្យទារកមិនអាចបៅយកទឹកដោះពីម្តាយបានឡើយ ព្រោះវាអាចបង្កបញ្ហាគ្រោះថ្នាក់ដល់ទារក ។
ចំណុចល្អរបស់ការបំបៅទឹកដោះគោម្សៅ ចំពោះការបំបៅទឹកដោះគោម្សៅ មាតាមួយចំនួនមិនសូវចង់ប៉ុន្មាននោះទេ តែវាជាការចាំបាច់មួយចំពោះម្តាយណា ដែលមិនមានទឹកដោះគ្រប់គ្រាន់ សម្រាប់បំបៅទារកពេលប្រើប្រាស់ថ្នាំ ឬម្តាយមានជម្ងឺប្រចាំកាយ ។ ម្តាយខ្លះទៀត គ្មានពេលវេលាសម្រាប់បំបៅដោះកូន រវល់ធ្វើការងារ ដើម្បីដោះស្រាយជីវភាព ។ ដូច្នេះហើយជម្រើសរបស់គាត់ត្រូវជ្រើសរើស ទឹកដោះគោម្សៅ ។ ទឹកដោះគោម្សៅថ្វីត្បិតតែមិនសូវមានការណែនាំ ពីគ្រូពេទ្យក៏ដោយ តែវាក៏មានផលប្រយោជន៍ដែរ សម្រាប់ករណីដែលមាតាមួយចំនួនចៀសវាងមិនបាន ។
សារៈប្រយោជន៍របស់ទឹកដោះគោ
១- សម្រាប់ជំនួសទឹកដោះម្តាយ ក្នុងករណីដែលម្តាយអត់មានទឹកដោះ ឬគាត់មិនអាចបំបៅដោះកូនដោយដោះគាត់បាន ។
២- មានករណីខ្លះទារកត្រូវការវីតាមីនបន្ថែមមួយចំនួន ដែលលើសពីធម្មតា ដែលទារកត្រូវការហើយ ខ្វះខាតវីតាមីនអ្វីមួយច្រើន ព្រោះនៅក្នុងទឹកដោះគោម្សៅនោះ អាចមានបរិមាណជួយបន្ថែមវីតាមីនបាន ។
៣- អ្នកខ្លះបំបៅដោះកូនច្រើនបង្កឲ្យមានបញ្ហាស្ត្រេស ក៏ជ្រើសរើសយកទឹកដោះគោម្សៅនេះតែម្តង ។
៤- ការបំបៅទឹកដោះគោម្សៅស្រួលម្យ៉ាងដែរ ព្រោះមិនចាំបាច់ម្តាយផ្ទាល់នោះទេ សូម្បីតែក្មួយ ម្តាយក្មេក ម្តាយបង្កើត ឬបងប្អូនក៏អាចឲ្យបៅបានដែរ ។
៥- ការបំបៅទារក ដោយទឹកដោះគោម្សៅបានយូរជាងបំបៅទឹកដោះម្តាយ ព្រោះម្សៅទឹកដោះគោក្ររំលាយអាហារ ដូច្នេះហើយវានៅតឹងពោះហើយបានយូរ មិនសូវបៅញឹកញាប់ជាងទឹកដោះម្តាយ ។
៦- ម្តាយដែលបំបៅទឹកដោះគោម្សៅ មិនចាំបាច់តមចំណីអាហារនោះទេ ម្តាយទទួលទានចំណីអាហារអ្វីក៏បាន ។
គុណវិបត្តិរបស់ការបំបៅដោះដោយទឹកដោះគោ
១- ទឹកដោះគោម្សៅមិនអាចមានប្រព័ន្ធការពារ ដូចទឹកដោះម្តាយនោះទេ ហើយប្រសិនបើក្រុមគ្រួសារប្រើប្រាស់ឧបករណ៍បំបៅនោះ មិនបានត្រឹមត្រូវអាចបង្កឲ្យទារកមានជម្ងឺ ។
២- ចំណាយលុយច្រើនលើទឹកដោះគោម្សៅ
៣-ធ្វើឲ្យក្មេងមិនស្រួលពោះ ហើមពោះ តឹងពោះ រាក ជួនលាមកក្តៀន
៤- ទឹកដោះគោម្សៅមិនអាចជំនួសទឹកដោះម្តាយបានមួយរយភាគរយទេ ។
ដំបូន្មានអ្នកជំនាញ
មាតាបិតាអាណាព្យាបាលទាំងអស់ គប្បីត្រូវបំបៅដោះកូនដោយ ទឹកដោះម្តាយជានិច្ច យ៉ាងហោចណាស់ក៏មានរយៈពេល ៦ ខែផងដែរ ។ មិនតែប៉ុណ្ណោះ ប្រសិនបើមាតាបំបៅដោះកូន ដោយទឹកដោះម្តាយនេះ លើសពី ៦ខែ ទៅ ១២ ខែកាន់ប្រសើរ ព្រោះវាជួយកាត់បន្ថយជម្ងឺផ្សេងៗ ដល់កុមារ ឲ្យជៀសផុត នូវជម្ងឺរលាកផ្សេងៗ ។ ម្យ៉ាងទៀត ម្តាយដែលបំបៅដោះកូន ដោយទឹកដោះក៏ទទួលបាននូវផលប្រយោជន៍ច្រើនផងដែរ គឺកាត់បន្ថយជម្ងឺមហារីកមាត់ស្បូន ជម្ងឺលើសគីឡូ និងជម្ងឺមហារីកផ្សេងៗ ផងដែរ ។ ដូច្នេះ ហើយមាតាគ្រប់រូបគួរជ្រើសរើសវីធីបំបៅដោះដោយទឹកដោះម្តាយ ៕
ប្រភព CEN
ដោយបងពេទ្យ
0 Komentar