រាជធានីភ្នំពេញ ៖ មន្ទីរពេទ្យកាល់មែ៉តក្នុងមួយឆ្នាំបានព្យាបាលករណីឆ្អឹងបែកបាក់១.០០០ករណីក្នុងចំណោម៧.០០០ករណី ហើយទទួលបានជោគជ័យច្រើនដោយសារមន្ទីរពេទ្យនេះមានគ្រូពេទ្យជំនាញវះកាត់ឆ្អឹងនិងមានសម្ភារទំនើបៗក្នុងការព្យាបាល ដូច្នេះសូមប្រជាពលរដ្ឋដែលជួបឧប្បត្តិហេតុនេះត្រូវតែទៅមន្ទីរពេទ្យដើម្បីព្យាបាលតាមបែបវេជ្ជសាស្ត្រ ។
លោកសាស្ត្រាចារ្យ សុខ ប៊ុនថា គ្រូពេទ្យវះកាត់ និងជាប្រធានផ្នែកវះកាត់មន្ទីរពេទ្យកាល់ម៉ែត បានថ្លែងថា បើមានបញ្ហាបាក់បែកឆ្អឹងសូមអញ្ជើញមកកាន់មន្ទីរពេទ្យកាល់ម៉ែតដើម្បីទទួលសេវាព្យាបាលតាមបែបវេជ្ជសាស្ត្រទំនើបដែលបច្ចុប្បន្នកំពុងមានការរីកចម្រើនជាពិសេសអ្នកជំងឺឆាប់បានជាសះស្បើយ និងបានទៅប្រកបមុខរបរវិញប្រសើរជាងទៅសម្រាកព្យាបាលតាមបែបបុរាណ ។ ហើយការព្យាបាលអ្នកជំងឺបាក់បែកឆ្អឹងភាគច្រើនកើតចេញពីគ្រោះថ្នាក់ចរាចរណ៍ ។
លោកសាស្ត្រាចារ្យសុខ ប៊ុនថា បានបញ្ជាក់ថា មន្ទីរពេទ្យកាល់ម៉ែតមានសម្ភារបែបវេជ្ជសាស្ត្រទំនើបនិងមានគ្រូពេទ្យជំនាញក្នុងការវះកាត់ឆ្អឹងបាក់បែកឆ្អឹង ហើយការព្យាបាលរហ័ស ឬយូរវាអាស្រ័យទៅលើស្ថានភាពជាក់ស្ដែងរបស់អ្នកជំងឺ ។ ការព្យាបាលបើអ្នកជំងឺនោះគ្មានការវះកាត់ទេ គឺគ្រាន់តែសម្រាកពីមួយថ្ងៃទៅពីរថ្ងៃបានហើយ តែបើអ្នកជំងឺដែលវះកាត់ត្រូវសម្រាកព្យាបាលពីមួយសប្តាហ៍ទៅ១០ថ្ងៃ ប៉ុន្តែបើរបួសច្រើនកន្លែងអាចយូជាងនេះ ។
ជាទូទៅកាលណាបាក់នៅកន្លែងឆ្អឹងត្រង់នោះវាមានការងាយស្រួលព្យាបាល ប៉ុន្តែអ្វីដែលពិបាកគឺបាក់ត្រង់ឆ្អឹងដែលនៅជាប់សន្លាក់ដូចជាជង្គង់ត្រគាក ឬកន្លែងកាច់បត់ដទៃទៀតវាមានការលំបាកក្នុងការព្យាបាលហើយអ្នកជំងឺប្រឈមនឹងការខូចសន្លាក់ទៀតផងគឺអ្នកជំងឺមិនអាចមានចលនាដូចដើមនោះទេ ។ ការព្យាបាលឆ្អឹងបាក់បែកនៅមន្ទីរពេទ្យកាល់មែ៉តនាពេលបច្ចុប្បន្នមានការរីកចម្រើនដោយសារមន្ទីរពេទ្យនេះមានសម្ភារទំនើបហើយគ្រូពេទ្យយកចិត្តទុកដាក់លើការព្យាបាលឆ្អឹងបាក់បែកនិងមានគោលការណ៍ច្បាស់លាសគឺឆ្អឹងបាក់ត្រូវការទាញតម្រង់មកវិញហើយអបវាឲ្យជាប់ និងឲ្យអ្នកជំងឺធ្វើចលនាបន្តិចម្តងៗមិនអាចបង្ខំបានភ្លាមៗទេ ។ ការដាក់ដែកទប់កុំឲ្យឆ្អឹងនេះភ្លាត់ទៅវិញហើយនៅពេលដែលឆ្អឹងតភ្ជាប់គ្នាស្រួលហើយនឹងធ្វើការវះកាត់យកដែកចេញវិញ រីឯដែកនេះមិនច្រែះទេហើយក៏មិនបណ្តាលឲ្យអ្នកជំងឺកើតតេតាណូសដែរ ។ ក្នុងទិសដៅនៃការព្យាបាលគឺធ្វើយ៉ាងណាឲ្យអ្នកជំងឺមានឆ្អឹងត្រង់ល្អហើយអ្នកជំងឺអាចធ្វើចលនបានឆាប់រហ័សនិងបានត្រឡប់ទៅធ្វើការងារវិញ ។ រហូតដល់ឆ្អឹងតភ្ជាប់គ្នាបានល្អទើបដោះយកដែកចេញហើយគ្រូពេទ្យក៏បញ្ចប់ការងារនេះ ។
លោកសាស្ត្រាចារ្យ សុខ ប៊ុនថា ប្រធានផ្នែកវះកាត់មន្ទីរពេទ្យកាល់ម៉ែតបានអំពាវនាវដល់ប្រជាពលរដ្ឋដែលជួបបញ្ហាបាក់បែកឆ្អឹងសូមអញ្ជើញមកទទួលសេវាព្យាបាលតាមបែបវេជ្ជសាស្ត្រទំនើបនៅមន្ទីរពេទ្យកាល់ម៉េតដែលកំពុងតែមានការរីកចម្រើនហើយកន្លងមកមន្ទីរកាល់មែ៉តតែងតែជួបបញ្ហាដែលអ្នកជំងឺបាក់បែកឆ្អឹងនេះទៅព្យាបាលគ្រូខ្មែរហើយមើលមិនជាទើបវិលមករកគ្រូពេទ្យតាមបែបវេជ្ជសាស្ត្រវិញបញ្ហានេះបានធ្វើឲ្យអ្នកជំងឺខាតបង់ពេលវេលាថវិកា និងបណ្តាលឲ្យអវយវៈដែលបាក់បែកនេះជាមិនដូចដើមទាំងស្រុងនោះទេ ៕
អត្ថបទ ច័ន្ទគ្រាស
ប្រភព កោះសន្តិភាព
0 Komentar